Áfram í tölvuskrappinu

Þar kom að því að ég set hér inn nýjar síður, er búin að vera að dunda aðeins í digitalskrappinu og finnst það voða gaman. Allt pappírsdótið liggur bara eitt og yfirgefið í föndurherberginu og enginn nennir að klappa því :-( . Ætli ég fari samt ekki að gefa því smá klappa fljótlega, má ekki detta út úr þvi alveg með allt nýja dótið sem ég á :-)


Ég er sem sagt búin að vera gera bæði síður sem eru svona imbaprúf þar sem ég geri lítið annað en að setja inn myndirnar, skreytti samt smá og gerði jú titla á það líka. Svo er ég búin að gera eina mynd þar sem ég nota svona Template þar sem búið er að gera formið á pappírnum getur maður sagt, svona fyrir þá sem ekki þekkja þetta, og þá þarf maður ekki að vera "klippa" pappírinn sjálfur til í forritinu. Voða þægilegt og fljótlegt form á þessu og maður bara velur pappír þar til maður er ánægður með niðurstöðuna og skreytir svo að vild. Hrein snild.

Hér koma svo herleg heitin, þessa fyrstu gerði ég svona til að prufa að vinna með template og hún er með mynd af Herdísi.

Svo gerði ég fjórar af þeim systrum í nýja sumar outfittinu sínu. Keypti á þær stuttbuxur, boli og derhúfur í Next á föstudaginn og það er óhætt að segja að þessi búningur sló í gegn. Þær vildu ólmar máta þegar þær sáu fötin og frá því kl. 4 og til 8 um kvöldið skottuðust þær um í fínu sumarfötunum sínum og fannst þær vera voðalegar fínar. Það var tekið mikið af myndum af þeim, enda ekki annað hægt þegar svona sætar stelpur og skemmtilegar eru annars vegar. Hlaupandi og knúsandi hverja aðra hér í gríð og erg svo montar með Danmerkur sumarfötin sín.

Finnst alveg snild að nota svona fyrir uppteknar húsmæður sem taka mikið af myndum en hafa ekki endalausan tíma í að skrappa þær, sparar líka að nota tölvuskrappið ef maður vill gefa þeim báðum albúm með myndum af þeim saman og sundur. Þetta kitt er eftir Alma Townsend og heitir Not Too Shabby, mjög flott og ég ætla mér að nota það meira og gera líka sjálf síður úr þessum pappír sem í því er.

Fallinn

Ég er fallinn og það illa, verð trúlega bara húkt næstu daganna. Við hittumst nokkrar frábærar konur í gærkveldi í þeim tilgangi að deila þekkingu og efni okkar á milli varðandi tölvuskrapp og lærðum allar eitthvað og komum flestar ríkari heim að allskonar digitalkittum til að nota í þessa hlið skrappsins. Ég hef svo gert síður áður í tölvuskrappinu en einhvern vegin ekki komið mér í að halda áfram í því aftur, gerði þó nokkrar fyrra og hitti fyrra en svo ekki söguna meir. En núna er ég búin með eina og hana er að sjá hér til hliðar. Hún er gerð í template sem er búið að hanna fyrir mann og svo er bara að velja liti á pappírnum og myndina sjálfa og skraut og raða því saman, voðalega fljótlegt. Ég er reyndar ekki alveg sátt við titilin hjá mér en það er líka það góða til tölvuskrappið að það er ekkert mál að laga og breyta hvenær sem er. Myndin af þeim systrum er tekin í síðasta snjónum sem kom, þar sem þær voru úti að leika í langan tíma og ekki á því að koma inn þrátt fyrir að vera orðnar vel kaldar. Ætla að gera fleiri síður frá þessari útiveru þeirra.
Ég sé alveg fram á að ég geti gert þó nokkrar svona síður handa dætrum mínum og prentað þær út í tveimur eintökum handa þeim til að þær geti átt hvor sitt eintakið að skoða.
Ég á nú samt ekki eftir að segja skilið við pappírsskrappið því það er jú aðeins annað að sitja og handleika pappír og dótið og dunda við að líma það niður og klippa en að sitja hér við tölvuna og skrappa.

Gleðilegt Skrappsumar

Svei mér þá ég held að heilin hafi skroppið saman í dag eða bara skroppið í frí. Sem sagt skrappheili. Eða það hafi frosið saman sumar og vetur í heilabúinu mínu.

Ég fór í Smáralindina í dag með stelpurnar mínar að horfa á lítinn frænda minn syngja með söngskóla Maríu og horfa á Skoppu og Skrítlu auðvitað. Nema þegar við erum á heimleið fór ég í Nóatún að kaupa smá og þaðan í Ísbúiðina að kaupa ís. Þegar ég er búin að bíða í lengri tíma í ísbúðinni þá sé ég að ég hef gleymt pokanum mínum í Nóatúni og fer að ná í hann og fer svo heim. Þegar heim er komið og ég fer að taka dótið út úr bílnum sé ég að ég hef gleymt íspokanum í ísbúðinni.

Er hægt að vera svona innilega heilalaus, finnst ég bara heppin að hafa munað eftir báðum
stelpunum. Var ekkert smá fúl búin að hlakka til að gæða mér að ísnum úti í sólinni í hengirólnunni :( Maðurinn minn fór því og keypti nýjan ís handa okkur og hughreysti mig um að þetta gæri gerst hjá bestu konum. Eitt er víst það verður tekin aukaskammtur af Omega 3 næstu morgna til að reyna stækka þetta heilabú aðeins.

Af skrappinu er það annars að frétta að ég er búin með þrjár síður í ferðaalbúminu okkar frá Danmerkurferðinni í fyrra og byrjuð á 4. Sé samt fram á að þetta verði frekar margar síður þar sem myndirnar eru alveg grilljón og auðvitað margar sem verður að skrappa úr.

Gleðilegt skrappsumar, hér á þessum bæ á að skrappa sem aldrei fyrr í sumar, enda af nógu af taka.

Ískápsdansinn

Þær halda áfram að verða til hjá mér síðurnar, og hér kemur sú nýjasta. Þessi er með myndum af henni dóttir minni yngri að dansa ísskápsdansinn, sem hún tekur stundum. Frá því hún kom heim með okkur þá hefur hún verið mjög svo hrifin af ísskápnum og er mikið í því að opna hann og fá sér sæti þar inni, mundi trúlega loka honum á eftir ef hún gæti. Þennan daginn tók hún með eindæmum góðan dans við ísskápinn og miklar dífur. Auðvitað er nauðsynlegt að standa upp á þessum græna dalli þegar maður tekur svona snúning.

Í síðuna notaði ég pappír úr Basic grey í 6x6 blokk og klippti út með munstursskærum sem eru að detta aftur inn í tísku, baksíðan er líka Basic grey en titillinn er frá MM (making memory) Svo voru auðvitað notaðir flottur dútl stimplarnir mínir nýju og ekki sé talað um bling steinarnir mínir sem ég fjárfesti í dag í. Fór sem sagt í Föndru og fann þessa líka flottu steina og keypti eina 1050 steina, í nokkrum litum og nokkrum gerðum. Vá hvað ég get skreytt síðurnar mína næstu vikurnar. Verða allir komnir með bling í augun, hehe. Lo er hannað af mér, bara svona út í loftið.

Síða eftir mig inn Basic grey

Ég prófaði í gær að senda síðu eftir mig inn á galleríið hjá Basic Grey sem er framleiðandi af flottasta pappírinum í skrappheiminum, eða alla vega með þeim flottari. Ég hugsaði sem svo að mín síða ætti svo sem alveg heima þar eins og svo margar aðrar sem þar eru og sendi inn. Þeir velja svo úr þær sem þeir vilja birta og auðvita fannst þeim mín síða bara flott og settu hana inn á galleríið sitt, nema hvað??

Hopp kostar koss

Síðurnar koma alveg á færibandi hjá mér þessa daganna, enda í algjöru skrapp stuði og fékk smá skrapp frí í dag á meðan heimilsfaðirinn fór með dæturnar í skemmtireysu um bæinn. Hann flakkaði á milli andartjarna í von um að einhverjar endur og gæsir vildu brauð, en hvorki Reykjavíkurendur eða Kópavogsendur voru svangar og því enduðu þau bara á opnu leiksvæði að leika sér og komu svo köld og sæl heim í kotið aftur og ég búin að gera þessa síðu á meðan. Þrátt fyrir syfju og þreytu eftir að hafa vaknað rúmlega 6 í morgun og búin að þrífa íbúðina í dag þá var ég harðákveðin í að nota tíman vel í að skrappa en ekki leggja mig, nóg tími til að sofa í ellinni, eða ég rétt svo vona það.

Síðan er unninn eftir LO frá henni Beggu, sem er ein sú færasta í LO gerð í það minnst hér á landi og þó víða væri leytað. Síðan fer í keppni sem hún heldur á skrappspjallinu sínu þar sem kostið verður um hver gerði flottustu síðuna eftir LO. Hef reyndar séð nokkrar í keppninni sem eru flottari en mín, en gamli ungmannfélagsandin gildir hér eins og í öðrum keppnum, bara gaman að vera með, sigur ekki allt í lífinu. Pappírinn er eins og svo oft áður Basic Grey og skrautið héðan og þaðan, mest þó héðan.

Sagan á bakið myndirnar er að þeim systrum finnst voða gaman að láta pabba sinn halda á sér og hoppa með sig í fanginu. Til þess að hann geti hoppað þarf hann fyrst að fá einn koss frá þeim og svo eftir hvert hopp til að hlaða batteríin, við þessi hopp skríkja þær úr kæti og hlæja sig máttlausar. Geypilegt fjör hjá þeim eins og alltaf.

Snemma beygist krókurinn

Það bara spænast undan mér síðurnar þessa daganna, eða þannig sko. Ein komin í viðbót í það minnsta. Hún er nú frekar skrautleg og helgast það kannski af einni góðri ástæðu. Þannig er mál með vexti að ég hef varið haldin mjög leiðum kvilla sem hefur stundum verið með smá verkjum. Hann lýsir sér þannig að ég tími ekki að nota sumt af því sem ég hef keypt mér af skrapp skrauti því ég ætla alltaf að nota það á einhverja aðra síðu sem ég er með í kollinum en kemst ekkert endilega í framkvæmd. Svo ég bara safna og safna að mér dóti og er einn sá mesti skrappnýskupúki sem fyrir finnst (hef reyndar trú um að þeir séu nokkuð margir svona skrapparnir inn í skápnum eins og ég er búin að vera lengi :o) Núna ákvað ég að hætta þessar vitleysu og loka nýskupúkan inn í skáp og koma út úr honum sjálf. Árangurinn er sem sagt þessi yfirhlaðin síða að rubon og blómum HEHE. En ég er samt bara nokkuð ánægð með hana. Myndin var smá ljót þarna í horninu þar sem ég setti rubbon skrautið og borðið er vel málað af eldri dóttir minni í sinni listsöpun þannig að ég ákvað að fela það með blóminu sem ég skar út úr pappírnum. :-)

Herdís finnst mjög gaman að sitja og reikna á reiknivélina mína á meðan ég sit og skrapp en stundum þarf hún að spyrja mig um hvort reiknivélin sé að segja satt, treystir mér betur en vélinni, eins og sést á þessari mynd af henni þá er hún voða hugsi yfir þessu.

Ég notaðist við LO frá Becky Fleck og Basicgrey pappír úr Uraban Couture línunni, rubbonið er líka frá BG.

Kláraði þessa í gærkveldi, hún skannaðist reyndar eitthvað illa hjá mér og litirnir koma eitthvað illa út í bakgrunninum á henni, sjáum til hvort ég næ að laga það eitthvað.
Þessir skór eru mjög merkilegir í augum dóttir minnar, eru nýir og hún tekur ekki í mál að fara í þeim út, eru bara skór til að vera í inni. Fer með þá með sér í poka á milli staða. Þeir eru svo æðislegir að hún vildi sofa með þá fyrstu næturnar og þeir félagar Karíus og Baktus fengu að gista í þeim, því ekki vildu hún leyfa þeim að gista í tönnunum sínum. Þeir eru víst að hugsa um að gerast grænmetisætur því þeir fá ekkert nammi í hennar munni. Ekki einu sinni páskaegg fengu þeir. Versta er að hún borðar trúlega jafnlítið grænmeti og sælgæti. Hún er búin að búa til mikið ævintýri um þá félaga og dvöl þeirra í skónum, enda með gott ímyndunarafl daman sú.

Tók stóra skrapp ákvörðun í kvöld.

Stærsta vandamálið hjá mér í að koma mér í að skrappa er að velja myndir. Ekki það að ég eigi svona fáar, á nokkra tugi þúsunda mynda að velja úr og það er stór hluti af vandamálinu erfitt að velja úr þeim öllum. Annar hluti af vandamálinu er að ákveða hvort ég vilji gera sumar síður í pappírs skrapp eða tölvuskrapp. Þær sem ég veit að litar hendur eiga eftir að fletta mikið í gegn og ég vill geta prentað út aftur og aftur vil ég gera í tölvuskrappi og eins þær sem ég vill geta gert tvö eins albúm. Eins og fyrir þær vinkonur Ellý og Auði, síður með myndum af þeim saman fara flestar í tölvuskrapp.

Ákvörðun kvöldsins var að skrappa Danmerkuferð okkar frá því i fyrra í 8*8 albúm handa Ellý, þá get ég bara prentað út allar þær myndir sem ég ætla að nota og svo bara skrappað þær þar til albúmið er tilbúið. Svo er bara að finna næsta verkefni og halda þannig áfram. Gekk best að skrapp þegar ég var að vinna í Kínaferðalaginu okkar nr. 1, þá gekk mest undan mér. Ég þarf svo að fara byrja á albúmi fyrir næstu ferð í sumar. Af nógu að taka svo mikið er víst og ég trúlega verð lengi að ná í skottið á mér og klára að skappa allar myndir til dagsins í dag.
Þá er að bretta upp ermarnar og byrja að velja myndir, en áður en ég byrja að skrappa þær ætla ég að gera tvær 12x12 síður með snúllunum mínum. Þær koma vonandi um helgina hér inn.

Jæja, fyrsta síðan sem ég set inn hér á bloggið. Þessa gerði ég í svona skrapplyft leik á ættleiðingarskrappspjallinu. Voru sem sagt með fyrirmynd sem við áttum að gera eftir, máttum auðvitað ráða hvað við notuðum af síðunni og hvað við gerðum öðruvísi. Voða gaman og maður er líka oftast fljótari aðgera svona síður heldur en þegar maður hannar síðurnar frá grunni sjálfur.

Þarna eru þær systur, Ellý að gefa Herdísi að borða og einbeitingin skýn af henni og hún alltaf jafn stolt af systir sinni. Pappírinn er Fancy Pant og svo notaði ég nýju flottu stimplanna mína í að gera dútilið og samtýnung af kósum til að lífga það við aðeins. Bara nokkuð sátt við útkomuna hjá mér.

Eitt af því yndislega stundumun í lífinu finnst mér er að sitja hér og skrappa út í bílskúr, í sér útbúinni aðstöðu minni þar og hlusta á eldri dóttir mína og pabba hennar að spjalla saman og leika sér frammi. Allt svo rólegt í kringum okkur og þau hjala saman á rólegu nótunum. Eru núna að byggja saman úr kubbum, veit ekki hvor skemmtir sér betur ef ekki bara jafnvel.
Lítil dama sefur ennþá úti í vagni en vaknar á hverri mínútu. Ætla að halda áfram að njóta þessa og halda áfrm að skrappa eina síðu með myndum af þeim systrum.